Connect with us

Labaran Wasanni

Aliko Dangote ya tabbatar da zai sayi Arsenal

Published

on

Aliko Dangote ya sake jaddada kudirinsa na sayan kulub din wasan kwallon kafa na Arsenal, a shekara ta 2021.

Mai kudin nahiyar Afrikan ya bayyana haka ne a yayin da ake wata hira da shi ta jaridar Bloomberg na kwana-kwanan nan.

A wani shiri na David Rubinstein , ya ce Dangote wanda ake da kiyasin ya mallaki kudi da suka kai kimanin fiye da Dalar Amurka biliyan 14  ya bayyana aniyarsa ta sayan kulub din wasan kwallon kafar.

Ya jima yana da burin mallakar kulub din Arsenal ,amma yakan bayyana cewa abinda ya hana shi sayan kulub din kuwa shine a halin da ake ciki yana da wani aikin da ya sa  a gaba wanda zai lakume akalla Dalar Amurka biliyan 20.

Dangote ya ce a yanzu ya fi maida hanakli wajen tabbatar da ganin ya kammala aikin kamfanin, wanda da zarar ya gama abinda zasu sa a gaba kuwa shine sayan kulub din.

“yanzu ba zan iya sayan Arsenal ba , amma tabbas shine abu na gaba da nake sa ran yi.”

A yanzu haka dai Arsenal na karkashin mallakin Stan Kroenke, wanda yake mallaki wani dan kasar Amurka ne.

Dangote, dai yana cikin masu kudi na Duniya inda yake mataki na 96 kamar yadda kididdigar Bloomberg’s Billionaire’s Index, ta bayyana, ya kuma fara harkar kasuwanci ne yana dan shekara 21, inda a shekara ta 2018 ya zamo dan kasuwar da ya fi kowa shahara a nahiyar Afrika sannan ya bayyana kudirinsa na mallakar kulub din.

 

 

Labaran Wasanni

Ya aka yi babu dan Najeriya cikin ‘yan wasa 11 da su kafi iya kwallo a Afrika?

Published

on

Daga Abubakar Tijjani Rabiu

A jiya Talata bakwai ga watan Junairun shekarar 2020 hukumar kwallon kafa ta Afrika CAF ta fitar da sunayen ‘yan wasan goma sha daya da su kafi iya murza kwallo a shekarar 2019 da ta gabata.

Sai dai cikin ‘yan wasan goma sha daya da aka fitar da babu sunan dan Najeriya ko daya a ciki, wanda hakan ya sanya masu bibiyar harkokin wasanni ke bayyana mabanbanta ra’ayoyi game da sunayen ‘yan wasan da aka fitar.

Wasu na ganin cewa hakan nada nasaba da rashin tabuka abin azo a gani da ‘yan wasan Najeriya basa yi a kungiyoyin suke wakilta musamman ma a nahiyar turai.

Za a tabbatar da hakan  idan aka kalli yadda dan Sadio Mane da Riyad Mahraz da kuma Muhammad Salah ken una bajinta a kungiyoyin da suke taka leda musamman ma irin rawa da suka taka a gasar cin zakarun nahiyar turai.

A yayin da wasu ke cewa, ya kamata ace hukumar kwallon kafar Afrika CAF ta sanya wasu ‘yan Nijeriya cikin jerin ‘yan wasan da suka fi iya taka leda a shekarar 2019 duba da yadda Najeriya ta kai matakin wasan dab dana karshe a gasar cin kofin Afrika na shekarar.

Haka kuma dan wasan gaba na Najeriya Odion Ighalo shine ya ya samu nasarar lashe kyautar dan wasan da yafi kowa zura kwallo a gasar ta cin kofin Afrika inda yake da kwallaye biyar. Amma duk da wannan bajinta Ighalo bai samu damar shiga cikin jerin ‘yan wasa sha daya ba.

Samuel Chikweze dake wasa a kungiyar kwallon kafa ta Villareal dake kasar Spaniya shima ya nuna bajinta a kungiyar sa sannan ya taka rawar gani a gasar cin kofin Afrika. Shima dai Victor Oshimhen dake wasa a kungiyar kwallon kafa ta Lille a kasar France ya cancanci shiga cikin jerin ‘yan wasan duba da irin gudunmawar da ya baiwa kungiyar sa a shekarar da ta gabata.

Ga jerin sunayen ‘yan wasan da hukumar kwallon kafar ta Afrika CAF ta fitar da sukafi iya murza kwallo a shekarar data gabata.

Andre Onana daga kasar Cameron dake wasa a kungiyar kwallon kafa ta Ajex a kasar Netherland shi ne aka zaba a matsayin mai tsaran ragar da yafi kwarewa a Afrika.

Sai masu tsaron baya wanda suka hada da Achraf Hakimi daga kasar Morocco dake wasa a kungiyar kwallon kafa ta Borussia Dortmund da Serge Aurier dan kasar Ivory Coast dake wasa a kungiyar kwallon kafa Tottenham sai Joel Matip daga kasar Cameroon dake wasa a kungiyar kwallon kafa ta Liverpool da Kalidou Koulibaly daga kasar Senegal dake wasa a kungiyar Napoli.

Daga bangaren ‘yan wasan tsakiya kuwa an zabi Idrissa Gueye daga kasar Senegal dake wasa a kungiyar kwallon kafar Paris Saint-Germain da Riyad Mahrez daga kasar Algeria dake wasa a kungiyar Manchester City da kuma Hakim Ziyech daga kasar Morroco dake wasa a kungiyar Ajax dake kasar Netherland.

Daga bangaren masu wasa a gaba kuwa an zabi Mohamed Salah daga kasar Masar dake wasa a kungiyar kwallon kafa ta Liverpool da Sadio Mane daga kasar Senegal shima dake daga Liverpool sai kuma Pierre-Emerick Aubameyang daga kasar Gabon dake wasa a kungiyar kwallon kafa ta Arsenal itama daga kasar ta Ingila.

Continue Reading

Labaran Wasanni

DA DUMI-DUMI: Sadio Mane ya lasher kyautar gwarzon dan kwallon kafa na Afrika

Published

on

An bayyana sunan dan wasan gaba na kungiyar kwallon kafa ta Liverpool dan kasar Senegal Sadio Mane a matsayin wanda ya lashe kyautar gwarzon dan kwallon kafa na Afrika na shekarar 2019.

Shugaban hukumar kwallon kafa ta Afrika CAF Ahmad Ahmad ne ya bayyana Mane a matsayin wanda ya lashe kyautar a yayin babban taron hukumar da ya gudana a kasar Masar.

Sadio Mane ya doke mai rike da kambun Muhammad Salah dan kasar Masar da Riyad Mahrez dan kasar Algeria wajen lashe kyautar.

A shekarar 2019, Mane ya jefawa Liverpool kwallaye 34 tare da taimakawa aka zura 12 wanda hakan ya taimakawa Liverpool lashe gasar cin kofin zakarun nahiyar turai.

Haka kuma Sadio Mane ya jagoranci kasar sa ta Senegal zuwa wasan karshe a gasar cin kofin Afrika inda suka yi rashin nasara a hannun kasar Algeria da ci daya mai ban haushi.

Continue Reading

Labaran Wasanni

Wa kuke ganin zai zama zakaran kwallon kafa na nahiyar Afrika a bana?

Published

on

A yau ne hukumar kwallon kafa ta Afrika CAF zata fitar da sunaye ‘yan wasan da suka fi bajinta a kwallon kafa a shekarar 2019 da muka yi ban kwana da ita.

A taron bayar da kyautar wanda zai gudana a kasar Masar, za’a bayyana gwarzon dan kwallon kafa a bangaren maza da gwarzuwar ‘yar kwallon kafa a bangaren mata.

Sai matashi da matashiyar ‘yan wasa a bangaren maza da mata, da kuma gwarzon mai horas da ‘yan wasa na maza dana mata.

‘yan wasa 3 da za’a zabi gwarzo a bangaren maza sune Riyad Mahrez da Sadio Mane da Muhammad Salah.

Riyad Mahrez ya taimakawa kungiyarsa ta Manchester City lashe gasar Firimiyar kasar Ingila, inda daga bisani ya jagoranci kasar sa ta Algeria lashe gasar cin kofin Afrika ta shekarar 2019 bayan da ya taka rawar gani a gasar, ciki kuwa har da kwallon da ya ci Nijeriya a bugun tazara a wasan kusa dana karshe na gasar, wanda hakan ya taimakawa Algeria zuwa wasan karshe tare da lashe gasar karon farko cikin shekaru 29.

Duk da ya kasa jagorantar kasar Senegal lashe gasar cin kofin Afrika na 2019 inda suka yi rashin nasara a wasan karshe a hannun kasar Algeria da ci daya mai ban haushi, Sadio Mane ya samu nasarar shiga cikin jerin ‘yan wasa 3 da za’a zabi gwarzon dan kwallon kafa na Afrika. Mane ya zura kwallaye 34 tare da taimakawa aka zura kwallaye 12 a shekarar ta 2019 wanda hakan ya taimakawa Liverpool lashe gasar cin kofin zakarun nahiyar turai.

Biyo bayan taimakawa kungiyar kwallon kafa ta Liverpool lashe gasar cin kofin zakarun nahiyar turai, mai rike da kambun kyautar Muhammad Salah dan kasar Masar ya samu nasarar shiga cikin jerin sunayen. Muhammad Salah ya zura kwallaye 26 tare da taimakawa aka zura kwallaye 10 a wasanni 55 da ya fafata a shekarar 2019.

A bangaren mata ‘yar wasan gaba ta Nijeriya Asisat Oshoala wadda ke taka leda a kungiyar kwallon kafa ta Barcelona dake kasar Spaniya, zata kara da Ajara Nchout yar kasar Cameroon daThembi Kgatlana yar kasar Afrika ta Kudu wajen lashe kyautar a bangaren mata.

A bangaren matasan ‘yan wasa akwai

Dan wasan Nigeria Samuel Chukwueze dake taka leda a kungiyar kwallon kafa ta Villarreal dake kasar Spaniya.

Victor Osimhen dan Nigeria mai wasa a kungiyar kwallon kafa ta Lille dake kasar Faransa.

Achraf Hakimi dan kasar Morocco wanda ke wasa a kungiyar kwallon kafa ta Borussia Dortmund dake kasar jamus.

A bangaren masu horaswa na maza

Aliou Cisse na  Senegal

Djamel Belmadi na Algeria

Moïne Chaâbani na Tunisia

A bangaren masu horaswa na mata

Alain Djeumfa na Cameroon

Desiree Ellis na Afrika ta kudu

Thomas Dennerby na Nigeria

Tsawon shekaru ashirin Kenan rabon da dan wasan Nijeriya ya samu nasarar lashe kyautar gwarzon dan wasan afrika.

Kanu Nwankwo shine dan wasan kasar nan na karshe da ya samu nasarar lashe kyautar a shekarar 1999, inda ya doke dan wasan kasar Ghana mai tsaron baya Samuel Kuffour da dan wasan kasar Ivory Coast Ibrahima Bakayoko.

Continue Reading

Now Streaming

Trending

Copyright © 2019. Freedom Radio Group. All Rights Reserved.

error: Content is protected !!