COVID-19 An dage gasar cin kofin Nahiyar Afirka

Hukumar shirya gasar cin kofin Nahiyar Afirka CAF ta sanar da dage gasar da za a yi a shekarar 2021 zuwa watan Janairun 2022.

Hukumar ta ce matakin ya biyo bayan annobar Covid-19 da ake fama da ita da ta addabi duniya.

Tun farko an tsara gudanar da gasar cin kofin Afirka a watan Janairun shekarar 2021.

Haka zalika hukumar CAF ta sanar da cewa an dage gasar cin kofin nahiyar Afirka na kungiyoyin da ke taka leda a cikin gida wato CHAN da aka tsara za a yi a watan Afrilu, yanzu haka dai an shirya gudanar da gasar a watan Janairun 2021.

Kasar Kamaru ce dai zata karbi bakuncin wasannin da za a yi na gasar cin kofin Afirkan.