Hukumar lafiya duniya WHO ta ce a wannan shekara za ta dauki gabaran yaki da cututtuka da ke alaka da tabin hankali da jama’a da dama ke fama da shi a wasu kasashen duniya da dama ciki har da Najeriya.

Hakan na kunshe ne cikin wani rahoto da Hukumar ta wallafa a jiya Laraba wanda ta bayyana kasashen da za ta gudanar da ayyukan da suka hada da: Najeriya da Bangladesh da Iraki da Jordan da Lebanon da kuma Sudan ta kudu

Sauran sune: Syria da Ukraine da kuma zirin Gaza da ke Yankin Palastinawa.

A cikin rahoton Hukumar ya kuma bayyana cewa akwai mutane da dama da ke fama da lalurar tabin hankali a wadannan kasashen wadanda akasari yana faruwa ne sakamakon rikice-rikice da ke addabar kasashen.

Haka kuma rahoton ya ce duk yaro daya cikin biyar yana fama da lalurar tabin hankali cikin wadannan kasashen sakamakon damuwa da suke fama da shi.

Gwamnatin Jihar Kano ta kori wasu jami’an bada allurar rigakafin shan-inna su 12 sakamakon samun su da laifin karya dokokin bayar da allurar allurar da suka yiwa wasu ‘yara yayinda ake gudanar da shirin.

Jami’in lura da asibitin sha ka tafi da ke yankin karamar hukumar Tarauni a nan Kano, Malam Nura Haruna ne ya tabbatar da hakan, lokacin da yake ganawa da manema labarai a nan Kano.

A cewar sa ma’aikatan sun sanya shaidar yiwa yara rigakafin allurar ta Polio da aka saba yiwa kananan yara bayan sun karbi allurar, inda aka gano cewa yaran da aka sanya musu wannan alamar ba’a yi musu rigakafin ba.

Nura Haruna ya tabbatar da cewa jami’an aikin allurar rigakafin an same su da laifin hada baki da iyayen yaran da basa son a yiwa ‘yayan su rigakafin, inda suka diga musu tawadar da ke nuna alamar an yiwa yaro allurar, alhalin ba hakan bane.

Jami’in kiwon lafiyar ya kuma bayyana cewa abinda gwamnatin Kano ta sanya a gaba shi ne kakkabe matsalar Polio a fadin jihar baki daya, kuma ba zata yi kasa a gwiwa ba wajen daukar mataki kan duk wanda aka samu yana yiwa shirin gwamnatin jihar makarkashiya.

Hukumar yaki da cin hanci da rashawa ta  EFCC ta musanta rahotannin da ke cewa, ta kama tsohon gwamnan jihar Imo Rochas Okorocha.

A cewar Hukumar ta EFCC babu kamshin gaskiya cikin labaran da ke yawo cewa ta kama Rochas Okorocha.

Tun farko dai kafofin yada labarai, sun yi ta yada cewa, hukumar EFCC ta kama Rochas Okorocha tare da matar sa.

Gwamnan Kano Dr Abdullahi Umar Ganduje ya sake nada Alhaji Usman Alhaji a matsayin sabon sakataren gwamnatin jihar ta Kano.

Haka zalika gwamna Ganduje ya kuma ce, Alhaji Shehu Mu’azu, ya ci gaba da kasancewa a mukamin akanta Janar na jihar Kano

Hakan na kunshe ne cikin wata sanarwa da sakataren yada labaran gwamnan Abba Anwar ya fitar.

Sanarwar ta ce, gwamna Ganduje ya gamsu matuka da yadda ya gudanar da ayyuka da mutanen biyu a wa’adin mulkin sa na farko, a don haka ya ga dacewar sake basu dama a wa’adin sa na biyu.

Kwalejin fasaha ta Kano ta bayyana aniyarta ta kara kaimi wajen bunkasa sha’anin koyo da koyarwa  ga dalibai.

Shugaban kwalejin Farfesa Mukhtar Atiku Kurawa ne ya bayyana hakan yayin zantawa da manema labarai a kwalejin.

Ya ce matakan da suka dauka sun hadar da tantance kwasa-kwasai da ake koyar dasu domin a yarda da su a duniya baki daya.

Farfesa Mukhtar Atiku Kurawa ya kuma kara da cewa, sun ga dacewar gyara harkokin gudanarwa a kwalejin musamman wajen  daukar dalibai.

Hukumar tantance kwasa-kwasan kwalejojin kimiyya ta NBTE a baya-bayan nan ta duba tare da sahale gudanar da kwasa-kwasai 51 bayan cika ka’idojin gabatar da su a sassan kwalejin ta fasaha dake nan Kano.

Hukumar kula da masu yiwa kasa hidima ta kasa NYSC, ta gardadi hukumomin jami’o’in kasar nan da su guji tura dalibai zuwa bautar kasa, da suka saba ka’idojin ta.

Daraktan Janar na Hukumar Birgediya Janar Shuaibu Ibrahim ne ya bayyana haka, a wani taron karawa juna sani a birnin tarayya Abuja, da ya gudana a daren jiya.

Birgediya ya kuma ce, hukumar NYSC ba zata saurara kowanne Jami’a ba, idan har ta gano suna tura dalibai zuwa bautar kasa bayan munzalin su bai kai su gudanar da hidimar kasar ba.

Ya kuam ce, hukumar a yanzu haka na shiryawa daliban jami’o’in kasar nan rukunin ’’B’’ shiga sansanonin horaswa a wayan Yunin mai kamawa, inda kuma za a ci gaba da biyan su Naira dubu Talatin a kowanne wata.

Hukumar kula da ilimin bai daya ta Najeriya UBEC ta ce kaso 57 na malaman makarantu a Najeriya ne suke da kwarewar aiki.

Shugaban Hukumar ta Dr Hamid Bobboyi ne ya bayyana haka a Kaduna lokacin da ya ke gabatar da wata mukala mai taken matsayin ilimi a jihar Kaduna.

Ya ce an samu karuwar malamai daga dubu dari takwas da arba’in da daya da dari bakwai da goma sha shida a shekarar dubu biyu da takwas zuwa miliyan daya da rabi a shekarar dubu biyu da goma sha takwas.u

Sai dai ya ce kaso arba’in da uku na malaman wadanda adadinsu ya kai dubu dari shida da arba’in da arba’in da biyar ba su da kwarewar aiki.

Kungiyar ma’aikatan kananan hukumomi ta Najeriya NULGE ta yi kira ga shugaban kasa Muhammadu Buhari da ya yi watsi da wasikar korafi da kungiyar gwamnoni ta kasa su ka rubuta suna bukatar da a dakatar da shirin bai wa kananan hukumomi ‘yancin sarrafa kudaden su.

Hakan na kunshe ne cikin wata wasika da kungiyar ta NULGE ta rubuta wa Shugaban kasa Muhammadu Buhari, tana kalubalantar korafin gwamnonin kan ‘yancin sarrafa kudade na kananan hukumomin.

A cewar wasikar wadda shugaban kungiyar ta kasa Ibrahim Khaleel ya aikawa shugaban kasa, ta ce, tsarin da sashen kula da hada-hadar kudi NFIU ya fito da shi, zai taimaka gaya wajen kawo karshen almubazzaranci da gwamnoni ke yi da kudaden kananan hukumomin kasar nan dari bakwai da saba’in da hudu.

A baya-bayan nan ne dai kungiyar gwamnoni ta kasa karkashin shugaban ta mai barin gado Abdulaziz Yari na jihar Zamfara ta rubutawa wasikar korafi ga shugaban kasa tana kalubalantar shirin da sashen kula da hada-hadar kudi ya fito da shi na haramtawa gwamnoni taba kudaden kananan hukumomi farawa daga watan gobe na Yuni.

Rundunar yan sandan jihar Anambra ta tabbatar da mutuwar mutane biyu sakamakon fadowar wani gini a yammacin jiya laraba a garin Onitsha.

Mai magana da yawun rundunar, Haruna Muhammad ne ya tabbatar da faruwar lamarin a wata sanarwa da ya fitar a AwKa babban birnin jihar.

A cewar sanarwa, ginin da ke lamba 9 a kan titin Ezenwa a garin na Onitsha  ya fado ne da misalin karfe 3:00 na yammacin jiya Laraba, kuma mallakin wani mutum ne mai suna Barista Ikebu.

Sanarwar ta kuma ce, tuni ‘yan sanda da masu bada agajin gaggawa suka kai dauki ga wadanda abin ya shafa, kuma an garzaya da su zuwa babban asibitin jihar da ke garin na Onitsha.