Shugaban kasa Muhammadu Buhari zai halarci taron yaki ta’addanci wanda za’a yi a Aqaba dake kasar Jordan daga ranar 2 zuwa 3 ga watan Disamba mai kamawa.

Wata sanarwa da mai baiwa shugaban kasar shawara kan harkokin yada labarai Femi Adesina  ya fitar ya ce shugaban kasa Muhammadu Buhari zai yi amfani da damar domin tattaunawa kan irin abubuwan da Najeriya ta fuskanta a harkokin ta’addanci.

Taron dai za’a yi shi ne domin dubawa da samar da dabaru da zasu yi maganin ta’addanci da kuma kafa jami’an tsaro na hadin gwiwa da zasu yi  shirin ko ta kwana wajen maganin hare-haren ta’addanci.

Tattaunawar da shugabannin za su yi anyi mata take da AQABA RETREAT sarki Abdallah na II na kasar Jordan ne zai bakunci taron.

Sannan shugaba Buhari zai yi amfani da wannan dama domin tattaunawar kara dankon zumunci da sauran shugabannin kasashen Duniya.

Bayan haka kuma shugaba Buhari da tawagarsa zasu halarci cin abinci na musamman wanda sarki Abdallah na II zai shirya ga shugabannin da suka samu halartar taron.

Gwamnan jihar Kano Dr Abdullahi Umar Ganduje ya amince da nadin Alhaji Umar Sa’idu Tudunwada a matsayin sabon manajin darakta na hukumar gidan Radiyon Kano.

Rahotanni sun ce Alhaji Umar Sa’idu Tudunwada ya maye gurbin Hajiya Sa’adatu Muhammad Babaji wadda aka daga likafarta zuwa mashawarciyar gwamna kan harkokin mata.

Wata sanarwa da kwamishinan yada labarai Malam Muhammad Garba ya sanyawa hannu ta ce sabon shugaban gidan Rediyon na Kano kwararren dan jarida ne da ya goge akan aikin sa, wanda ya rike manyan mukamai a baya, ciki harda mukamin babban manaja na rukunin gidajen Rediyon Freedom da kuma Rediyo Dandal kura a matsayin babban darakta.

Ya kuma taba zama babban edita a gidan talabajin na ARTV lokacin yana CTV ya kuma yi aiki da muryar Amurka sannan ya yi aiki da radiyon Jamus a sashin Hausa da kuma Turanci, ya kuma rike mukamin edita a concern Magazine sannan ya taba zama mataimaki na musamman ga tsohon gwamnan Kano Rabiu Musa Kwankwaso.

Alhaji Umar Sa’idu Tudunwada ya kuma taba zama sakataren kungiyar yan jaridu ta jihar Kano.

Sanarwar da kwamishinan yada labaran ya bayar ta ce nadin ya fara aiki ne nan take.

Gwamnatin Najeriya ta bukaci shugabannin mabiya addinai a kasar da su ci-gaba da bada gudunmawar su ga yaki da cin hanci da rashawa da ake yi ta hanyar fadakar da al’umma a lokcin hudubobin su.

Ministan Birnin tarayya Abuja Malam muhamamd musa Bello ne ya yi wanna kira lokacin da wakilai da ga kungiyar malaman addinin musulunci ta Afrika da kai masa ziyara ofishin sa da ke birnin tarayya Abuja.

Ya kuma ce ya lura yana daya daga cikin abubuwan da zasu kubutar da Najeriya cikin matsalolin da take fama da su, inda ya ce gwamnati mai ci yanzu ta maida hankali wajen ganin ta magance matsalolin cin hanci da rashawa.

A nasa jawabin shugaban kungiyar Dr, Muhammad Ahmad Loh da ya fito daga kasar Senegal ya bukaci hadin kai tsakanin da yin aiki kafada da kafada da gwamnati wajen yaki da cin hanci da rashawa a kasshen Afrika.

Rundunar sojin Najeriya ta ce ta samu nasarar kubutar da wasu mutane 212 daga hannun mayakan kungiyar Boko Haram, lokacin da suka kai sumame wasu kauyuka da ke makwabtaka da dajin sambisa, inda suka samu kuma nasarar kakkabe mayakan da ke zaune cikin kauyukan.

Wata sanarwa da kakakin rundunar Birgediya Janar Sani Usman Kukasheka ya fitar yau, ta bayyana cewa rundunar ta samu nasarar cafke daya daga cikin jagororin kungiyar mai suna Amman Judee inda suka kashe hudu daga cikin mayakan.

Birgediya Janar Kukasheka ya kuma ce yanzu haka rundunar ta fara binciken wanda suka cafken, wadanda kuma aka samu nasarar ceto su an killace su wuri guda, inda aka gudanarwa kananan yaran da ke tare da su allurar rigakafin polio.

Rahotanni sun bayyana cewa wannan shine karo na biyu a cikin sati guda da rundunar sojin najeriya ta samu nasarar ceto mutane daga hannun mayakan kungiyar Boko Haram, wadanda adadin su ya tasamma dari biyu da arba’in da biyu.

A ranar asabar ne rundunar ta ceto wasu mutane 30, inda suka samu nasarar kashe mayakan kungiyar goma sha daya a wasu kauyuka takwas da su ka kai sumame da ke yankin karamar hukumar Bama.

Rahotanni sun bayyana cewa kimanin mutane dubu dari ne suka rasa rayukan su tun bayan billowar rikicin mayakan Boko Haram tun daga shekarar 2009 zuwa yanzu.

Hukamar kula da yan hidimar kasa NYSC ta tabbatarwa da ‘yan hidimar kasar cewa babu wani dan bautar kasa da za’a kaishi aiki inda ake fargabar babu cikakkaen tsaro a wurin.

A wata sanarwa mai dauke da sa hannun daraktan Ruko kuma mai magana da yawun hukumar Misis Adenike Adeyemi ta ce Sulaiman kasazure ya bayyana hakan ne lokacin da ya ke bayani gaban rukinin B na masu yiwa kasa hidima a sansanin yan yiwa kasa hidima dake karamar hukumar Tsafe a jihar Zamfara.

Haka kuma da yeka jawabi gaban yan yiwa kasa hidima Rukunin na B dake Wammako a jihar Sokoto ya jaddada cewa kare lafiya da kuma tabbatar da tsaron kowanne dan hidimar kasa na daya daga cikin abinda hukumar ta fi baiwa muhimmanci.

Ya kuma yi kira ga masu yiwa kasa hidima dasu yi riko da sana’o’in hannu don gujewa zaman banza tare da jiran gwamnati ta basu ayyukukan yi bayan sun gama bautar kasa.

Babban bankin Najeriya CBN ya sanar da cewa ya kori wasu daga cikin daraktocin bankunan kasuwancin kasar bayo bayan hannu da suke da shi a badakalar kudaden rance da bankunan suke bayarwa.

Daraktan bibiyar ayykan bankunan Mr.Adedapo Adeleke ne ya bayyana hakan lokacin da yake gabatar da wata takarda mai taken ‘’Duba kan yadda irin matsalolin da rancen da bankuna ke fuskanta a kasar nan a yayin wani taron wayar da kan yan jaridu da ya gudana a nan Kano.

Sai dai kuma Mr.Adedapo bai bayyana sunayen daraktocin da aka kora ba zuwa yanzu.

Ya ce bankin ya dauki wannan mataki ne don dakatar da badakalar da ke yawan aukuwa kan kudaden rance da bankun ke bayarwa.

Ya kuma kara da cewa bankunan sun fada cikin matsalolin sakamakon faduwar farashin mai a kasuwannin duniya tun a shekarar 2014.

Kan hakane kuma ya bayyana cewa dolene sai bankuna sun mike tsaye don lalubo hanyoyin tare kuma da hada hannu da babban bankin kasa a kan dakile irin wannan matsalolin.