Shugaba Buhari ya yi sammacin gwamnan Katsina

Shugaban kasa Muhammadu Buhari ya yi sammacin gwamnan jihar Katsina Aminu Bello Masari, sakamakon ci gaba da kashe-kashen ‘yan bindiga da ke gudana a jihar.

Da ya ke tattaunawa da manema labarai a fadar shugaban kasa a daren jiya Laraba bayan tattaunawa da shugaban kasa, gwamna Aminu Masari, ya ce, matsalar ‘yan bindiga a jihar, ya yi munin gaske, lamarin da ya sa manoma a yankunan da lamarin ya fi kamari ba sa ziyartar gonakin su.

A cewar gwamna Masari, yanzu sun gamsu cewa, ‘yan bindigar ba wai kawai barayin Shanu bane domin kuwa irin shirin da suke da shi wajen aikata ta’addan cin su, ya fi karfin a ce barayin shanu ne.

A baya-bayan nan ne dai, ‘yan bindga suka kashe mutane da dama a jihar ta Katsina, lamarin da ya sa, wasu al’ummar jihar suka gudanar da zanga-zanga a gidan gwamnatin jihar dauke da gawawwakin wadanda suka rasa rayukansu.