Ƴan bindiga sun sace hakimi a Neja – Ƴan sanda

Rundunar ƴan sandan jihar Neja ta tabbatar da sace hakimin Wawa Dakta Mahmud Aliyu, a karamar hukumar Borgu ta jihar.

Jami’in hulda da jama’a na rundunar DSP Wasiu Abiodun ne ya tabbatar da faruwar lamarin a zantawar sa da manema labarai.

Ya ce, ƴan bindiga sun yi garkuwa da hakimin daga fadarsa a daren Asabar da misalin karfe 10.

Abiodun ya ce tuni ƴan sanda sun fara bin sawun ƴan bindigar don ceto hakimin da kuma gano maɓoyar su.

Har ma ya buƙaci mazauna yankin da su tallafawa hukumomin tsaro da bayanan sirri don yaƙi da masu garkuwa da mutane a jihar.