Ƴan Soshiyal Midiyan APC masu tallan Tinubu a Arewa sun tafi yajin aiki

Haɗakar ƙungiyoyin ƴan Arewa masu amfani da kafafen sada zumunta wajen tallata Ɗan takarar shugaban ƙasa a APC Bola Ahmad Tinubu sun tafi yajin aikin sai baba ta gani.

Hakan na cikin wata sanarwa da suka aike wa Freedom Radio, mai ɗauke da sa hannun Shugaban Haɗakar Ƙungiyoyin Malam Rabi’u Biyora da Sakatarensa Khalid Ibrahim Angale.

Sanarwar ta nemi dukkan ƴan soshiyal midiya daga ƙungiyoyi daban na jihohin Arewa 19 da birnin tarayya Abuja kan su dakatar da duk wani motsi na tallata tafiyar Bola Tinubu da Kashim Shetima.

Haɗakar ƙungiyoyin sun kuma nemi mambobinsu da su yi haƙuri su saurari saƙo na gaba.

Idan zaku iya tunawa tun bayan babban taron yaƙin neman zaɓen a APC a birnin Jos na jihar Filato aka samu sabon rikici a tafiyar ƴan Social Media.

Inda suka zargi ba a basu kulawa ba, ana kuma nuna musu fifiko tsakaninsu da ƴan Film.