NAHCON zata samo sabon kamfanin jigilar alhazai

Hukumar aikin hajji ta Nijeriya NAHCON ta kafa wani kwamiti da zai nemo wani sabon kamfanin da zai yi hidima ga alhazan kasar a lokacin aikin hajjin shekara mai zuwa ta 2024.

Shugaban hukumar NAHCON, Zikrullah Hassan, ne ya bayyana hakan a jiya alhamis yayin taron lakca da bada lambar yabo da aka shirya a Abuja.

A cewar Zikirullah, ana sa ran kwamitin da aka kafa zai samar da wasu hanyoyi da za a bi domin kyautatawa mahajjata kafin aikin hajjin shekara mai zuwa.

‘Haka zalika an raba guraben aikin hajji ga hukumomin jin dadin alhazai na jihohi domin fara shirye-shiryen aikin hajjin badi akan lokaci’.

A baya dai Alhazan kasar sun koka kan rashin yi musu hidima yadda ya kamata da wasu kamfanonin Saudiyya ke yi.

Rahoton: Abdulkadir Haladu Kiyawa