An samu barkewar cutar amai da gudawa a Borno

Gwamnatin jihar Borno ta tabbatar da barkewar cutar Amai da gudawa ta Cholera, a jihar da mutum 559 suka kamu da cutar.

Kwamishinan lafiya ta jihar, Juliana Bitrus ce ta bayyana haka lokacin da take zantawa da manema labarai a Maiduguri babban birnin jihar Borno.

Juliana Bitrus, ta ce kawo yanzu haka mutum 43 ne suka mutu sakamakon cutar daga cikin wanda suka kamu su 559.

Kwamishinar tace an samu bullar cutar a kananan hukumomin Gwoza da Kaga da Hawul sai Magumeri da Damboa, da Maiduguri da barkewar cutar tafi kamari a yankunan jihar.

Ta kara dacewa gwamnatin jihar na daukar matakan shawo kan cutar, tare da tura jami’an lafiya don killace wanda suka kamu da bada kariya ga sauran mutanen da basu kamu ba.