Annobar corona: Likitoci 30 ne suka mutu dalilin cutar – NMA

Ƙungiyar likitoci ta ƙasa NMA ta ce, annobar corona ta yi sanadiyyar mutuwar likitoci 30 a ƙasar nan.

Shugaban ƙungiyar Innocent Ujah ne ya bayyana hakan a zantawar sa da manema labarai.

Innocent Ujah ya ce, har yanzu gwamnati ta gaza biyan iyalan mamatan kuɗaɗen diyya da zai rage musu raɗaɗi duk da cewa sun rasu ne a bakin aikin su.

A cewar sa, likitocin da ke aiki a yankin kudu masu gabashin ƙasar nan na fuskantar ƙalubale na rashin biyan su kuɗaɗen albashin su tsawon shekaru biyu, wanda hakan ya shafi rayuwar su kai tsaye.