Ba mu samu umarnin ƙara farashi ba – Masu ruwan leda a Kano

Ƙungiyar masu sayar da ruwan leda da ake kira Pure Water a Kano ta ce, ba ta samu umarnin ƙara farashin kuɗin ruwan ba.

Mai magana da yawun ƙungiyar na biyu Idris Umar ne ya sanar da hakan a zantawarsa da Freedom Radio da safiyar yau Alhamis.

Ya ce, har kawo yanzu babu wani shiri da suke na kara farashin ruwan leda a wannan lokaci, duk da tsadar kayan aiki da suke fuskanta.

Wannan dai ya biyo bayan wata sanarwa da kungiyar masu sayar da ruwan leda ta kasa ta fitar a safiyar yau Alhamis, mai ɗauke da sa hannun shugabar ƙungiyar ta kasa Mrs Clementina Ativie.

Sanarwar da ce, farashin jakar ruwan a yanzu ya tashi daga Naira ɗari biyu da ake sayarwa zuwa ɗari uku a matsayin sabon farashi.