Ba ni ne ba a faifan bidiyon da ake yaɗawa ɗauke da bindiga ba – Ministan tsaro

Ministan tsaron ƙasar nan Manjo Janar Bashir Salihi Magashi mai ritaya, ya musanta wani faifan bidiyon da yake yawo a kafafen sada zumunta cewa an ganshi ya shiga jirgi dauke da bindiga kirar AK-47.

Maibaiwa ministan shawara kan kafafen yada labarai Muhammad Abdulkadir ne ya bayyana hakan, ta cikin wata sanarwa da ya fitar.

Sanarwar ta ce, hotunan da kuma faifan bidiyon labari bashi da tushe ballanta makama, kawai dai masu shirin tada zaune tsaye ne suka kirkire shi.

Muhammad Abdulkadir ya tabbar da cewa, ba za a ƙyale wadanda suka kirkiri bibiyon ba, domin kuwa za a gudanar da bincike domin gano su tare da daukar mataki na gaba.