Babu wanda ya mutu a rikicin Bauchi

Rundunar yan sandan jihar Bauchi ta musanta rahoton da dan majalisar dokokin jihar Gazali Wunti ya gabatar da ke cewa an samu asarar rayuka a wani rikici da akayi a iyakokin karamar hukumar Ganjuwa da karamar hukumar Dikku ta jihar Gombe.

Mai magana da yawun rundunar Ahmed Wakil ne ya bayyana hakan yayin zantawar sa da manema labarai.

Yace wasu mutanen karamar hukumar Dukku ne suka shiga gonakin manoman karamar hukumar Ganjuwa, wanda hakan ya jawo hatsaniya .

Tun da fari dai dan majalisar mai wakiltar Ganjuwa ta gabas ya gabatar da rahoton cewa al’ummar yankin Dukku sun kai hari wani kauye a mazabar Gungura wanda yai sanadiyar rasa rayuka.

A cewar wakil babu rahoton asarar rai a arangamar da suka yi kamar yadda aka fitar da rahoto a baya.