Buhari na wata ganawar sirri da shugaban ƙasar Turkiyya

Shugaban ƙasa Muhammdu Buhari na wata ganawar sirri da shugaban ƙasar Turkiyya Recep Tayyip Erdogan a Villa da ke Abuja.

Tun da fari dai Recep Tayyip Erdogan ya isa Abuja da yammacin ranar Talata don yin wata tattaunawa ta musamman da shugaba Buhari.

Ana dai sa ran shugabannin biyu za su tattauna kan abubuwa 24 da suka ƙulla yarjejeniyar fahimtar juna a kai.

Ziyarar ta shugaba Recep Tayyip Erdogan na cikin wata sanarwar da mataimaki na musamman ga shugaba Buhari kan harkokin yaɗa labarai Mallam Garba Shehu ya fitar.

Sanarwar ta ce, ana sa ran Recep Tayyip Erdogan zai ƙaddamar da cibiyar kula da al’adu ta ƙasar Turkiyya a Abuja.