Buhari zai gina asibiti mai gadaje 14 a fadarsa

Gwamnatin tarayya za ta gina asibiti a fadar shugaban kasa da zai dauki gadaje 14.

Shugaban kasa Muhammadu Buhari ne ya amince da gina asibitin kamar yadda babban sakataren fadar shugaban kasa, Alhaji Umar Tijjani ya bayyana yayin da yake kare kasafin kudi a gaban kwamitin majalisar dattawa.

Ya ce ginin asibitin na fadar shugaban kasar zai lakume kudi kimanin naira biliyon 21.9.

A ranar litinin 1 ga watan Nuwambar 2021 ne za a fara aikin gina asibitin wanda aka baiwa kamfanin Julius Berger aikin.

Ya kuma ce za a kammala aikin ne a watan Disambar shekara mai kamawa ta 2022.