Da gaske da kyar na sha ba wasan kwaikwayo na shirya ba – Gwamnan Benue

Gwamnan jihar Benue Samuel Ortom ya musanta zargin da ake yi masa na cewa, ya tsara wasan kwaikwayo ne game da batun ikirarin da ya yi na cewa, ‘yan bindiga sun kai wa jerin gwanon motocinsa hari a kauyen Tyomu da ke kan titin Gboko zuwa Makurdi.

A yayin zantawa da ‘yan jaridu bayan gudanar da wani taron sirri da shugaba Buhari a fadar Asorok, Samuel Ortom ya ce zancen cewa shi da kansa ya tsara harin, tsoki burutsu ne kawai.

A cewar sa, zai yi matukar wuya ace ya tsara hari domin kuwa a cikin jami’an tsaro da ke kula da lafiyarsa, akwai Hausawa, Fulani da kuma Yarbawa da ma sauran wasu yaruka na daban.

‘‘Ni fa na fi son in bar batun da muka tattauna tsakani na da shi (shugaban kasa). Ya yadda da abin da ya faru dani kuma ya bani shawara kan abin da ya kamata inyi. Sannan suma jami’an tsaro suna aikin su, saboda haka ban damu da abin da jama’a ke cewa ba’’ a cewar gwamnan.