Dattawan Kwankwasiyya ne suka kai ƙara ta wajen Buhari – Ganduje

Gwamnatin jihar Kano ta ƙalubalanci wasu cikin dattawan Kano kan matakin da suka ɗauka na kai wa shugaba Muhammadu Buhari ƙorafi kan batun ƙarɓo bashi da gwamnatin Kano ke shirin yin daga kasar China.

Kwamishinan raya karkara na Kano Musa Iliyasu Kwankwaso shi ne ya bayyana hakan ta cikin shirin Kowane Gauta na nan Freedom Radio dake bada damar faɗin albarkacin baki karkashin sashi na talatin da tara na kasar nan.

Kwamishinan ya ce “ku ma janye maganar cewa dattawan jihar Kano ne su ka kai korafin, don kuwa dattawan kwankwasiyya ne kadai”.

Musa Ilyasu ya zargi dattawan da yunkurin hana ci gaban jihar Kano, inda ya ce gwamnati ta tattauna da masana kan batun ciyo bashin domin kuwa abu ne da zai kawo wa Kano ci gaba tare da farfaɗo da tattalin arzikin jihar dama kasa baki daya.