Dole ne a kafa ‘Yan-sandan jihohi – Tinubu

Shugaban ƙasa, Bola Ahmed Tinubu, ya buƙaci Majalisar Wakilai ta sanya matakan kariya a cikin gyaran kundin tsarin mulki domin kafa ‘yan sandan jiha, ta yadda gwamnoni ba za su iya amfani da su wajen cin zarafi ba.

Ya bayyana haka ne a fadar shugaban ƙasa yayin buɗa-baki da ‘yan majalisar, inda ya jaddada cewa tsaro al’amari ne na cikin gida, don haka dole a yi gyaran da zai haɗa da tsarin da ba za a iya amfani da shi ba kamar yadda aka yi a jamhuriya ta farko.

Shugaban ya ce dole ne a kafa ‘yan sandan jiha domin tinkarar matsalolin tsaro, amma a yi hakan da tsare-tsare masu ƙarfi. Ya kuma yaba wa ‘yan majalisar kan goyon bayan da suka ba gwamnatinsa kan cire tallafin mai da kuma sassauta darajar naira.