Gwamnan Kano yayi alƙawarin bayar da tallafi ga ma’aikatan gidan Gwamnati

Gwamnan jihar Kano Injiniya Abba Kabir Yusuf ya kafa tarin a gidan Gwamnatin Kano inda jagoranci shan ruwa da ɗaukacin ma’aikatan fadar gwamnatin Kano da suka haɗar da manyan Daraktoci da sauran bangarori da suke aiki a gidan Gwamnatin.

Shan ruwan ya biyo bayan irin ƙoƙarin da ma’aikatan cikin gidan suke yi wajen gudanar da ayyukan jihar.

Wannan na ƙunshe ta cikin wata takarda mai ɗauke da sa hannun Babban Daraktan yaɗa labaran Gwamna Sunusi Bature Dawakin Tofa da ya fitar a ranar Lahadi.

Da yake jawabi Gwamna Yusuf ya bayyana ƙoƙari da irin rawar da ma’aikatan cikin gidan Gwamnati suke bayarwa a kullum wajen gudanar da ayyukan gwamnati, adan haka ya zama dole mu yaba muku kuma mu samar muku hanyoyin da zamu taimake ku.

Alhaji Abba Kabir Yusuf ya kuma ce yanzu haka a tsarin sa akwai tsarin bayar da tallafi ga ma’aikatan gidan Gwamnati da sauran ma’aikatan gwamnati da suke jihar.

Daga ƙarshe gwamnan ya yabawa dukkanin ma’aikatan faɗar gwamnatin Kano dama al’ummar jihar baƙi ɗaya inda ya sha alwashin ci gaba da fito da tsare-tsaren da zasu ciyar da kano gaba.