Gwamnatin Kwara ta musanta mutuwar ɗan NYSC sakamakon zazzbin Lassa

Gwamnatin Jihar Kwara ta musanta  rahotannin da ake yadawa a kafafen sada zumunta cewa wani ɗan bautar ƙasa ya rasa ransa sakamakon  kamuwa da zazzbin Lassa, a sansanin horas da matasa masu bautawa kasa  na jihar.

Wannan na cikin wata sanarwa mai dauke da sa hannun Sakataren yada labarai na ma’aikatar lafiyar jihar Saad Hamdalat, bayan da ma’aikatar ta gudanar da binciken gaggawa.

Sanarwar ta ce, sakamakon binciken karkashin kwararriyar Likita Dr Khadeejah Kamaldeen, bai bayyana wata shaida ta samuwa ko yaduwar zazzabin  Lassa a sansanin NYSC din ba.

Haka kuma ba a samu wani ko wata da ake zargi da cutar ba, sai dai an ƙara tsaurara matakan   kariya ga yan bautar kasar a sansanin.