Kamfanonin Jiragen Sama sun koka bisa hauhawar farashin man Jiragen

Ma’aikatan Jiragen sama sun nuna damuwarsu kan cigaba da samun hauhawar farashin man Jirgi wato Jet A1.

A yanzu haka dai farashin man ya kai naira 315 a duk lita daya, lamarin da ya sanya wani kwararren masanin harkokin Jiragen sama ya ce, ka iya kawo karin kudin Jirgi a Najeriya.

Ya kuma ce, a yanzu ana sayar da tikitin sa’a daya daga kan kudi naira dubu 45 zuwa naira dubu 60 musamman idan akwai karancin fasinjoji.

Daga shekarar 2016 farashin litar man ya karu da kaso 200, inda ya tashi daga naira 160 zuwa naira 305 a farkon wannan shekarar da muke ciki, yayin da kuma ya kai naira 315 a karshen makon da ya gabata.