Ko ka bayyana gaban mu ko mu gayyaci Buhari – Majalisar wakilai ga Mele Kyari

Majalisar wakilan kasar nan ta ce matukar shugaban kamfanin man fetur na kasa NNPC Mele Kyari ya ci gaba da kin martaba gayyatar da ta masa, to ba ta zabi face gayyatar shugaban kasa Muhammadu Buhari.

Shugaban kwamitin harkokin man fetur na majalisar Musa Sarkin-Adar ne ya yi wannan barazana a jiya alhamis lokacin sauraron ba’asin dalilin soke lasisin wasu kamfanonin hakar mai guda 4, wanda ya samu halartar karamin ministan mai Timipre Sylva.

Musa Sarkin-Adar ya ce tunda Mele Kyari ya gaza amsa gayyatar ta, to shugaba Buhari a matsayinsa ministan man fetur za su gayyata don amsa tambayoyi game da abinda ya shafi harkokin man a Najeriya.

Tun a ranar 23 ga watan Afrilun jiya ne dai shugaba Buhari ya umarci hukumar kula da albarkatun mai ta kasa DPR da ta janye soke lasisin kamfanonin da ta yi.