Kungiyar ma’aikatan kananan hukumomi NULGE ta yi barazanar gudanar da zanga-zangar gama gari

Kungiyar ma’aikatan kananan hukumomi ta kasa NULGE ta yi barazanar gudanar da wata zanga-zangar gama gari matukar majalisun dokokin jihohi dana tarayya suka yi watsi da dokar baiwa kananan hukumomi ‘yancin cin gashin Kansu.

Shugaban kungiyar reshen jihar Kano Comrade Abdullahi Muhammad Gwarzo ne ya bayyana haka yayin zantawa da manema labarai yau.

Ya ce ko kadan ‘yayan kungiyar ba za su amince da ci gaba da kasancewar kananan hukumomi karkashin ikon jihohi ba.

Comrade Abdullahi Muhammad Gwarzo ya kuma nuna rashin jin dadin sa game da rahotannin da ke nuna cewa majalisar dokokin Kano taki amincewa da dokar.

Kungiyar ta kuma sha alwashin daukar wasu matakai masu tsauri matukar aka ki baiwa kananan hukumomin damar sarrafa kudaden su kamar yadda jihohi da gwamnatin tarayya ke yi.