Lambar katin ɗan kasa zai zama wajibi a lokacin rijistar jarrabawa – WAEC

Hukumar shirya jarrabawar kammala sakandire ta yammacin Afrika WAEC ta ce, za ta sanya buƙatar lambar katin ɗan ƙasa ta NIN ya zama wajibi ga ɗaliban da za su rubuta jarrabawar a ƙasar nan.

Mai magana da yawun hukumar Patrick Areghan ne ya bayyana hakan, yayin da yake jawabi a jihar Lagos.

Ya ce, hukuncin hakan ya biyo bayan dokar da gwamnatin tarayya ta sanya na buƙatar mallakar katin zama ɗan kasa ga kowanne ɗan kasar nan.

Patrick ya kuma ce, tuni hukumar ta buƙaci ɗaliban da za su rubuta jarrabawar a bana, da su mika lambar NIN ɗin su ga hukumomin makarantar.

Hukumar ta ce, daga shekarar 2022, sanya lambar NIN ɗin yayin yin rijistar jarrabawar zai zama wajibi ga kowane dalibi.