Ma’aikatan lafiya 7 sun kamu da Coronavirus a Borno

Gwamnatin jihar Borno ta ce jami’an lafiya 7 ne suka kamu da cutar Covid-19 a jihar.

Kwamishinan lafiya na jihar kuma sakataren kwamitin yaki da cutar Covid-19 na jihar Salihu Kwaya-Bura ne ya bayyana hakan a ranar jumu’ar nan, yayin taron bayar da bayanai kan halin da ake ciki game da annobar a jihar.

Jaridar Premium Times ta rawaito kwamishinan ya ce yanzu haka an samu mutum 15 da suka kamu da cutar, inda 2 daga ciki suka rasu.

Sannan yanzu haka an killace mutane 145 wadanda sukayi mu’amala da wadanda suka kamu da cutar domin tabbatar da lafiyarsu.

Har ila yau kwamishinan ya ce baya ga wadancan, sun samu kira har guda 9 daga al’ummar gari wanda yanzu haka suke kan bincike akai.