Masu sana’ar ruwan kura na barazanar lalata titin Ƙofar Nasarawa – Dakta Kabiru Getso

Ma’aikatar muhalli ta jihar Kano za ta ɗauki mataki kan masu ɗibar ruwan kura a ƙarƙashin gadar Ƙofar Nasarawa.

Kwamishinan muhalli Dakta Kabiru Ibrahim Getso ne ya bayyana hakan lokacin da ya kai zirar wajen a Asabar ɗin nan, a wani ɓangare na ranar tsaftar muhalli.

Getso ya ce “Mun samu ƙorafi kan yadda masu ɗiban ruwa a ƙarƙashin gadar ke barazanar lalata titun da aka kashe miliyoyin nairori wajen ginawa”.

“Mun ba su kwana uku su gyara wajen ko mu hana su ɗibar ruwan a wajen gaba ɗaya” in ji Getso.

Kwamishinan ya bayyana damuwar sa kan yadda masu sana’ar ɗiban ruwan suke barin ruwa yana kwaranya titin abinda ke barazana ga lalacewar sa.