NNPC da DPR ne ke taimakawa wajen fasa-kwaurin man fetur – Hamid Ali

Shugaban hukumar hana fasa-kwauri ta Najeriya, Kanal Hamid Ibrahim Ali ya alakanta matsalar yawan fasakwaurin man fetur zuwa kasashen ketare da gazawar kamfanin man fetur na NNPC da sashin albarkatun man fetur na kasa.

Hamid Ali ya dai zargi bangarorin biyu da rashin kiyaye dokokin da aka shimfida wajen magance matsalolin fasakwaurin man fetur a Najeriya.

Ya ce kamfanin na NNPC na ci gaba da ba wa gidajen man da su ke kusa da iyakokin kasa man fetur wanda hakan ya saba wa shawarwarin hukumar.

Ya kuma zargi sashin albarkatun mai, DPR, da ci gaba da sahale gina gidajen man a iyakokin kasar nan, yayin da hakan yasabawa doka.