Nura M. Inuwa ya nemi afuwar masoyan sa

Mawaƙin nan Nura M. Inuwa ya nemi afuwar masoyan sa kan rashin cika alƙawarin da ya yi musu na sakin sabon kudin waƙoƙin sa.

Ta cikin wani saƙo da ya wallafa a shafin sa na Facebook, Nuran ya roƙi masoyan sa kan su yi masa afuwa, sannan su ƙara haƙuri zai saki kundin waƙoƙin nan ba da jimawa ba.

A baya dai mawaƙin ya yi alƙawarin cewa zai saki kundin waƙoƙin sa na wannan shekara a ƙarshen watan Fabrairun da ya shuɗe.

Bisa al’ada dai dai Nura M. Inuwa yana fitar da kundin waƙoƙin sa sau biyu a kowace shekara.

Amma a shekarar 2020 da ta gabata bai fitar da kundin ba, lamarin da ya sanya masoyan sa suka riƙa neman ba’asi.

A zantawar sa da Freedom Radio, Nuran ya ce, abin da ya sa bai fitar da kundin waƙoƙi a 2020 ba, shi ne domin ya bai wa wasu dama.

Yanzu haka dai dubunnan al’umma ne suka shiga yin tsokaci tare da bayyana mabanbantan ra’ayoyi kan neman afuwar da mawaƙin ya yi a kafafen sada zumunta.