PDP ta caccaki Buhari kan shirin daga likafar Magu

Jam’iyyar PDP ta yi All- wadai kan shirin da tace fadar shugaban kasa na yi na bawa tsohon shugaban hukumar yaki da cin hanci da rashawa na kasa EFCC Ibrahim Magu sabon mukami.

A cewar jam’iyyar, ana zargin Magu da aikata laifukan da suka shafi cin hanci da rashawa a lokacin da yake rike da mukamin hukumar ta EFCC.

Hakan na cikin wata sanarwa da mai Magana da yawun Jam’iyyar ta PDP na kasa, Kola Ologbondiyan ya sanya wa hannu a ka kuma raba ga manema labarai yau a Abuja.

Sanarwar ta ce, bai kamata ba ace gwamnatin kasar nan dake ikirarin yaki da cin hanci da rashawa kuma ta goyi bayan cin hancin.

Sanarwar ta kuma ce, gwamnatin shugaba Muhammad Buhari na shirin nada Ibrahim Magun ne mukamin mataimakin Sufeto Janar na ’yan sandan kasar nan.