Pi-CNG ya nuna damuwa kan rahotannin da suka bayyana kan fashewar mota a Kaduna

Shirin Shugaban Kasa kan Daskarariya Iskar Gas da kuma abubuwan hawa masu amfani da  Lantarki Pi-CNG & EV ya nuna damuwa kan rahotannin da suka bayyana kan fashewar wani abu a wata mota a safiyar jiya Lahadi a jihar Kaduna.

Ta cikin wata sanarwa da Shugaban, Sashen Harkokin Sadarwa na ma’aikatar Onyekachi Eke, ya fitar aka rabawa manema labarai, ta ce  halin yanzu, babu tabbacin sanadin faruwar lamarin, yayin da bincike ke ci gaba da gudana.

Sanarwar ta kara da cewa shirin na aiki kafada da kafada da hukumomin jihohi da na tarayya don tabbatar da gaskiyar lamarin.

Hukumar ta ce CNG makamashi ne mai aminci, abin dogaro, kuma mai araha, tare da fa’idar rage gurbatar iska da tallafawa makamashi mai tsafta, da ta bukaci jama’a da su zauna lafiya, tare da watsi da jita-jita ko rahotanni masu tayar da hankali  yayin da bincike ke gudana.