Rundunar Operation Safe Haven ta kama manyan yan fashi 4

Rundunar sojin Najeriya ta Operation Safe Haven, ta kama manyan yan fashi 4 tare da ƙwato bindigu da harsasai a jihar Filato.

Jamiʼin yada labaran rundunar Major Samson Nantip Zhakom, ne ya bayyana hakan ta cikin wata sanarwar da ya fitar ranar Lahadi.

Sanarwar, ta ruwaito cewa, a sojoji sun kama wasu yan fashi 2 dauke da bindiga kirar Pistol yayin da su ke sintiri a unguwar Naraguta a daren ranar Asabar.

Ta kuma kara da cewa, a safiyar Lahadi kuma sun sake kama wani ƙasurgumin ɗan fashi a kusa da Crest Hotel da ke Jos ta Arewa, inda aka same shi da bindiga da harsasai.

Bayan bincikarsa ya fallasa abokinsa wanda shi ma tuni an kamo shi a Masallacin Idi na Ali Kazaure.

Haka kuma, ta cikin sanarwar, jami’in ya kuma bayyana cewa, binciken ya gano wata bindiga da harsasai a maɓoyarsu.