Connect with us

Manyan Labarai

Shekara daya da rasuwar Shagari: Irin ayyukan da yayi wa Najeriya.

Published

on

Tso

A ranar 28 ga watan Disambar shekarar 2018 a yammacin Juma’a Allah yayiwa tsohon shugaban Najeriya farar hula na farko rasuwa ,Alhaji Shehu Usman Aliyu Shagari.

Tsohon shugaban kasa Shagari ya rasu ne a babban asibitin kasa dake Abuja inda daga bisani gwamnan jihar Sokoto Aminu Waziri Tambuwal ya karbi gawar sa a filin jirgin sama na Sultan Abubakar III a garin Sokoto.

An haifi Marigayi Alhaji Shehu Shagari a ranar 25 ga watan Fabrairun shekarar 1925 a garin Shagari dake Jihar Sokoto.

Alhaji Shehu Shagari shahararran dan siyasa ne kuma yana daga cikin na gaba gaba wajen kafa jam’iyyar NPC a jamhuriya ta farko .

Tsohon shugaban kasa Shagari yayi minista a gwamnatin    Firaminsita Abubakar Tafawa Balewa inda yayi ministan harkokin tattalin arziki da sauran su.

Lokacin da aka tumbuke gwamnatin Sir Abubakar Tafawa Balewa a ranar 15 ga watan Janairun 1966 Alhaji Shehu Shagari na daya daga cikin wadanda suka yi kokarin ganin an bi tsarin Mulki domin mika gwamnati ga mataimakin Firaminista Zanna Bukar Diprachima.

Amma shugaban majalisar dattijai na wancan lokacin Dr Nwafor Orizu wanda shi ne ya kamata ya gayyaci kafa gwamnati da Zanna Bukar Diprachima zai shugabanta yaki.

Nwafor Orizu ya gayawa Shugaba Shagari da mukarrabansa cewa su koma gida sai an neme su ,wannan dalili ne ya saka ta babban gidan Rediyo na Najeriya suka ji Dr Nwafor Orizu na gayyatar tsohon Shugaban kasa Manjo Janar Thomas Umunakwe Aguiyi Ironsi ya yi wasu jawabi inda daga baya hakan ta saka Ironsi ya kafa gwamnati.

Janar Olusegun Obasanjo na mika mulki ga Shugaba Shagari a ranar 1 ga watan Oktoban 1979.

Bayan da aka rusa gwamnatin su ta farko Shugaba Shagari ya koma jihar sa ta asali wato rusasshiyar Jihar Arewa maso yamma mai shalkwata a Sokoto inda ya zama kwamishinan ilimi a gwamnatin Assistant Commissioner Usman Faruk.

Gwamnatin tarayya ta sake gayyatar Alhaji Shehu Shagari karkashin gwamnatin Janar Yakubu Gowon inda ya zama Ministan harkokin tattalin arziki wanda a lokacin ana kiran minista da Federal commissioner , bayan nan ne akayi masa sauyin ma’aikata ya koma ministan kudi wato Federal commissioner of Finance.

SHIGAR SA SIYASA

Tun jamhuriya ta farko Alhaji Shehu Shagari dan siyasa ne goggage amma lokacin da sojoji suke shirin mika mulkin Najeriya ga hannun farar hula lokacin da aka kafa jam’iyyu a shekarar 1978 Shugaba Shagari ya yi niyyar ya fito takarar danmajalisar dattijai ne wanda daga bisani ya canja shawara.

An yi zaben fitar da gwani na shugaban kasa a jamiyyar NPN inda Alhaji Shehu Shagari yayi takara da Marigayi Malam Adamu Chiroma da Marigayi Danmasanin Kano Yusuf Maitama Sule .

A zaben shugaban kasa da aka yi a watan Agustan shekarar 1979 Shehu Shagari ya lashe zabe da kuri’a fiye da miliyan biyar inda ya doke abokan takarar sa, da suka hada da Marigayi  Chief Obafemi Awolowo na jamiyyar UPN da Dr Nnamdi Azikiwe na jam’yyar NPP da Malam Aminu Kano na jam’iyyar PRP da Alhaji Ibrahim Waziri na jami’yyar GNPP.

RANTSAR DA SHI DA AYYUKAN RAYA KASA.

Bayan da tsohon shugaban kasa Janar Olusegun Obasanjo ya mikawa Alhaji Shehu Shagari Mulki ya fara cika alkawarurrukan da ya dauka a yakin neman zabe ,daga cikin ayyukan da Alhaji Shehu Shagari yayi wa Najeriya sun hada da gina gidaje a kowacce shalkwatar jiha, a lokacin Najeriya na da jihohi 19.

Wadannan gidaje su aka rika kira da Shagari Quarters,bayan wannan Marigayi Shugaban kasa Shagari ya gaggauta fara aikin cigaban sabon birnin tarayya Abuja, inda ya cigaba da yiwa birnin ayyukan samar da gadoji da tituna da gidan shugaban kasa.

Alhaji Shehu Shagari ya kafa kamfanunuwan mulmula karafa na Osogbo steel rolling mill da Ajaokuta Steel company.

Ya samar da gidaje na musamman a birnin Legas.

Shugaba Shagari ya sake lashe zaben shugaban kasa karo na biyu a watan Agustan shekarar 1983, an kuma sake rantsar da shi a ranar 1 ga watan Oktoban Shekarar 1983.

TUMBUKE SHI DAGA MULKI DA SOJOJI SUKA YI.

Watanni uku cif da fara wa’adin sa na Mulki a karo na biyu ,sojoji a shekarar 1983 ranar 3 1 ga watan Disamba suka tumbuke shugaba Shagari daga mulkin Najeriya ,suka kuma nada Manjo Janar Muhammadu Buhari wanda shi ne shugaban kasar Najeriya a yanzu.

RASUWAR SHAGARI

Alhaji Shehu Shagari ya rasu da yammacin juma’a ranar 28 ga watan Disambar shekarar 2018 yana da shekaru 93 da watanni goma a Duniya.

An yi janaizar sa a Jihar Sokoto wanda shugaban babban masallacin Abuja Farfesa Shehu Ahmad Galadanchi ya jagoranta.

Janaizar Shugaba Shagari a Shagarin Sokoto a ranar 29 ga watan Disambar 2018.

Allah ya gafarta masa.

Coronavirus

Covid-19: Babu hawan sallah a Kano

Published

on

Maimartaba Sarkin Alhaji Aminu Ado Bayero yayi kira ga al’ummar Kano da su kiyaye dangane da yanayin da ake ciki na annobar Covid-19 da ta janyo sauyawar al’adun fada.

Sarkin ya bayyana hakanne a daren Asabar a Kofar Kwaru yayin da yake jawabi a gaban manyan hakiman sa kan yadda za a gudanar da sallar bana.

Maimartaba Aminu Ado ya ce babu hawan sallah na al’ada da masarautar Kano ta sabayi duk shekara saboda yanayin Corona.

Sarkin ya kara da cewa maimakon hakan Sarki zai tafi idi a kafa, inda zai fito ta kofar Fatalwa har zuwa filin idi na Kofar Mata da safe.

Bayan an idar da sallar idi kuma Sarkin zai biyo ta unguwar Kofar Wambai da Zage, sannan ya biyo ta Dorayi da Shahuci daga nan ya zarto zuwa Kofar Kwaru a Mota.

Ana sa ran Sarkin zai yi jawabi ga al’ummar Kano bayan sakkowa daga sallar idin a Kofar Kwarun kamar yadda al’adar masarautar Kano take.

Wakilinmu na fadar sarkin Kano Muhammad Harisu Kofar Nassarawa ya rawaito mana cewa Sarkin Kano Alhaji Aminu Ado Bayero ya jajantawa al’ummar Kano sakamakon rashe-rashen da aka samu sannan yayi fatan marasa lafiya Allah ya basu lafiya.

A karshe Sarkin yayi kira ga al’ummar Kano da su cigaba da kiyayewa tare da yin biyayya ga matakan da masana kiwon lafiya suka sanya wajen dakile yaduwar cutar Corona.

A shekarun baya dai, kafin annobar Covid-19 ta bullo akan shafe kwanaki biyar ana gudanar da hidimomin al’ada na masarautar Kano a yayin bikin karamar sallah.

Hoton Gwamnan Kano Dakta Abdullahi Umar Ganduje da Sarkin Bichi Alhaji Aminu Ado Bayero.

Continue Reading

Labarai

Ana shagulgulan karamar sallah yau a Nijar

Published

on

Al’ummar jamhuriyar Nijar sun bi sahun takwarorin su daga kasashen musulman duniya wajen shagulgulan salla karama.

A jiya ne dai majalisar musulunci ta kasar ta fitar da sanarwar ganin jinjirin watan a wasu sassan kasar wanda hakan ke nufin kawo karshen watan azumin Ramadan.

Tun da sanyin safiya ne dai al’ummar musulmin kasar suka yi fitar dango dan halartar masallatan idi.

Da misalin karfe 9 na safe ne, Limamin babban masalacin Idi ya jagoranci sallah raka’a biyu kamar yadda addinin musulunci ya tanada kafin daga bisani ya gabatar da huduba da harshen larabci.

Bayan haka suma daya bayan daya gwamnonin jihohi da mai martaba sultan na Damagaram sun gudanar da wani takaitaccen jawabin barka da salla ga al’ummar jihar.

Wannan sallah dai na zuwa ne a daidai lokacin da ake fama da cutar Covid-19 lamarin kuma da ya rage armashin sallar masamman ga magidanta da ke kukan rashin kudi.

Wakilinmu Yakuba Umaru Maigizawa ya rawaito mana cewa za’a ci gaba da bukukuwan karamar sallar har nan da kwanaki uku masu zuwa kamar yadda aka saba a al’adance.

Ku kalli hotunan yadda sallar idi ta kasance:

Continue Reading

Labarai

Ba a ga watan Shawwal ba a Najeriya

Published

on

Rahotonnin daga fadar Sarkin Musulmi Alhaji Muhammad Sa’ad Abubakar na cewa ba a ga jinjirin watan Shawwal ba a yau Juma’a.

Hakan na nufi musulmi za suyi azumi 30 a wannan wata mai alfarma na Ramadhan.

Cikin wata sanarwa da masarautar sarkin musulmi ta fitar a dazu-dazun nan ta ce za a yi bikin karamar sallah a ranar Lahadi 24 ga watan Mayun da muke ciki.

Ganin watan Shawwal dai shine ke kawo karshen wata mai alfarma da musulmai ke gudanar ibada, daga nan ne kuma musulmi a fadin duniya ke gudanar da bukukuwan Sallah.

Continue Reading

Listen Live

Freedom Radio Kano 99.5 FM Freedom Radio Kaduna 92.9 FM Freedom Radio Dutse 99.5 FM Dala FM Kano 88.5

Now Streaming

Subscribe to Freedom Radio via Email

Enter your email address to subscribe to this site and receive notifications of new posts by email.

Join 324,276 other subscribers.

Trending

Copyright © 2019. Freedom Radio Group. All Rights Reserved.

error: Content is protected !!