Shekaru na suna buƙatar hutu – Buhari

Shugaban ƙasa Muhammadu Buhari ya ce yana sa ran barin ofishinsa a daidai lokacin da shekarun sa ke buƙatar hutu, daga yin aiki tsawon awanni a kowacce rana.

Shugaba Buhari ya bayyana haka ne a wata hira da gidan talabijin na ƙasa NTA a jiya Alhamis.

Shugaban ya ce da yawa daga cikin takwarorinsa na jin dadin ritayar da suka yi, kuma yana fatan ya yi koyi da su nan da watanni 17 masu zuwa, lokacin da wa’adinsa na mulki ya ƙare.

A cewarsa tuni shekarun sa suka nuna masa cewa yin aiki a yanzu na tsawon awanni 6 zuwa zuwa 8 a rana, ba abin wasa bane.

Shugaba Buhari ya kuma ce ba ya tsammanin ‘yan Najeriya za su yaba masa idan ya bar mulki, sai dai kawai su gane cewa ya yi iya ƙoƙarinsa.