Sojoji su sake bude sansanin sojojin ruwa na Baga don manoma su yi aikin su a yankin Tafkin Chadi – Zulum

Gwamnan jihar Borno, Babagana Umara Zulum ya bukaci Sojoji da su sake bude sansanin sojojin ruwa na Baga domin tabbatar da an bai wa manoma damar yin ayyukan su a yankin Tafkin Chadi.

Gwamna Zulum ya yi wannan kira ne yayin karbar sabon kwamandan rundunar hadin guiwa ta Operation Hadin Kai Manjo janar Christopher Musa a gidan gwamnati da ke Maiduguri.

Wannan dai ya biyo bayan rokon da gwamna Zulum ga shugaban kasa Muhammadu Buhari a yayin ziyarar da ya kai jihar Borno a makon da ya gabata, inda kuma shugaban Buhari ya ba da tabbacin cewa gwamnatinsa za ta samar tsaro ga noma musamman wadanda suka dawo daga gudun hijra don inganta rayuwar su.

Idan za a iya tunawa tun a watan Disambar 2018 ne mayakan Boko Haram suka kai hari sansanin sojojin ruwa da ke Baga tare da kwashe musu tarin makamai da alburusai daga ma’ajiyar makaman su.