Sojoji sun hallaka ’yan ta’adda tare da lalata cibiyar kera bama-bamai a Zamfara

Rundunar sojojin saman kasar nan NAF ta  Operation Fansa Yamma, ta hallaka  ’yan ta’adda da dama tare da lalata cibiyar kera bama-bamai da sansanonin su a jihar Zamfara.

Hakan na kunshe ne a cikin wata sanarwa da mai magana da yawun sojojin saman, Air Commodore Ehimen Ejodame, ya fitar a baya baya nan.

A cewar sa rundunar ta gudanar da hare-haren sama guda biyu masu tasiri a Dutsen Turba da kuma sansanin Kachalla Dogo Sule.

Dukkanin hare-haren an kai su ne a karamar hukumar Tsafe ta jihar Zamfara, da aka kashe ’yan ta’adda da dama.

Air Commodore Ejodame ya ce bangaren sama na rundunar, bisa samun  sahihan bayanan sirri daga tushe daban-daban, ta tura jiragen yakin NAF domin kai farmaki kan maboyar ’yan ta’adda a wuraren da aka gano.