Yajin aiki: Ƴan daba sun mamaye sakatariyar kungiyar NLC a Kaduna

Ƴan daba dauke da muggan makamai sun mamaye harabar sakatariyar kungiyar kwadago ta kasa (NLC) da ke Kaduna.

Rahotanni sun ce ƴan dabar wadanda yawansu ya haura ɗari sun isa sakatariyar ƙungiyar ce wanda anan ne wajen da ƴan ƙungiyar kwadago ke taruwa kafin fara zanga-zangar da suke yi wanda ɗaya ne daga cikin matakan da suke dauka na ci gaba da yajin aikin gargadi na kwanaki biyar da su ka fara.

Sai dai bayanai sun tabbatar da cewa daga bisani ƴan sanda sun tarwatsa dandazon ƴan dabar tare da kama guda ashirin daga cikinsu.

Mai magana da yawun rundunar ƴan sandan jihar Kaduna ASP Muhammad Jalinge ya tabbatar da faruwar lamarin, yana mai cewa tuni aka tura da jami’an tsaro don dakile barkewar rikici