Za mu fara ɗaukar sabbin malamai – Gwamna Badaru

Gwamnatin jihar Jigawa ta ce, za ta fara ɗaukan sabbin malamai a dukkanin ƙananan hukumomin jihar.

Kwamishinan ƙananan hukumomi a jihar Alhaji Kabiru Hassan Sugungun ne ya bayyana haka jim kaɗan bayan kammala shirin “Barka da Hantsi” na Freedom Radio.

Sugungun ya ce “Bayan shekara 30 da ƙirƙirar jihar, an samu nasarori a ɓangaren Ilimi da noma da kuma bunƙasa ƙananan hukumomi”

Alhaji Kabiru Sugungun ya ce, yanzu haka gwamnatin jihar na shirin ɗaukar malaman makaranta na wucin gadi a kowacce ƙaramar hukuma, waɗanda daga bisani za’a tabbatar da su a matsayin cikakkun ma’aikata.

“Baya ga wannan ma, mun bijiro da tsarin bai wa matasa aikin yi ta hanyar tantance su a cikin ƙananan hukumominsu na asali don rage zaman banza” a cewar Sugungun.

Haka zalika ya ce gwamnatin jihar tana tallafawa manoma don bunkasa tattalin arziki.