Zamu samar da karin na’urorin lura da tsaro a filayen jiragen saman Najeriya-FAAN

Gwamnatin tarayya ta ce za ta kara samar da karin na’urorin dake inganta tsaro a filayen jiragen saman kasar nan.

Shugaban hukumar lura da zirga-zirgar jiragen sama na kasa FAAN Kyaftin Rabiu Yadudu, ne ya bayyana hakan jiya a birnin tarayya Abuja.

Ya ce ya zama dole hukumar ta kara sanya idanu a filayen jiragen saman kasar nan, domin magance batagarin da ke kokarin aikata ta’addanci a filayen jiragen saman.

Yadudu, ya ce irin wannan mataki da gwamnati ta dauka zai taimaka mata wajen inganta dabarunta na dakile matsalar rashin tsaro a harkar sufurin jiragen sama.

Haka zalika ya ce hukumar za ta ci gaba da aiki-kafada da kafada da jami’an tsaron domin ganin harkokin zirga-zirgar jiragen sama ta ci gaba da tafiya yadda ya kamata.