Ƙidayar jama’a: Za a kashe sama da biliyan 190 a 2022

Majalisar dattijai ta ce, an ware sama da Naira biliyan 190 domin gudanar da ƙidayar jama’a a shekarar 2022.

Kwamitin majalisar mai kula da yawan jama’a da tantance ƴan kasa ne ya bayyana hakan ta bakin shugaban kwamatin, Sanata Sahabi Alhaji Ya’u jim kaɗan bayan kare kasafin kudin 2022.

Sanata Ya’u ya ce sama da Naira biliyan 190 aka warewa aikin ƙidayar jama’a, kuma da zarar shugaban kasa ya amince za a fara gudanar da ayyukan.

Ko da aka tambaye kan cewa lokacin ƙidayar ya yi daidai da lokacin zaɓe? shugaban kwamitin Ya’u ya ce, sai da aka yi tunani mai kyau sannan aka gano lokacin ne mafi dacewar ayi ƙidaya.