Za mu fara kidayar jama’a rana 29 ga watan Maris

Hukumar kidaya ta Najeriya NPC ta ce, za a gudanar da kidayar jama’a daga ranar 29 ga watan Maris zuwa 2 ga watan Afrilun shekarar da muke ciki.

Shugaban hukumar Nasir Kwarra ne ya bayyana hakan a jiya juma’a lokacin da yake zantawa da manema labarai bayan ganawarsa da shugaba Muhammadu Buhari a fadar shugaban kasa da ke Abuja.

Kwarra ya yi alkawarin cewa aikin kidayar a bana zai sha bamban da na baya domin za a gudanar da shi ne ta hanyar amfani da fasahar zamani.

Ya kuma bayyana cewa tuni hukumar ta kammala daukar ma’aikatan wucin gadi kuma an kammala tantance wuraren da aka yi kidayar gwaji a dukkanin kananan hukumomi 774, gabanin atisayen da za a kammala a ranar 2 ga watan Afrilu.