Ɗan zago ne halastaccen shugaban APC – Ɗan Sarauniya

Tsohon Kwamishinan ma’aikatar ayyuka Injiniya Mu’azu Magaji Ɗan sarauniya ya ce har yanzu Alhaji Ahmadu Haruna Zago ne halastaccen shugaban jam’iyyar APC a Kano.

Ɗan sarauniya ya bayyana hakan a wani sauƙin murya da ya aikewa Freedom Radio.

Ɗan sarauniya ya ce “Zaɓe an yi an gama kuma tuni muka samu nasara ta hanyar lashe zaɓen da Ɗan zago yayi”.

“Kamar yadda ake jin raɗe-raɗe akwai inda aka yi zaɓe, amma fa gurguntacce dan takara ne, domin bai bi tsarin shiga takara ba da kuma tsarin dimukuraɗiyya”.

Ya ci gaba da cewa “Mu dama akwai ƴan takara 2 kuma sun janye wa Ɗan zago wanda hakan ya bashi damar zama zaɓaɓɓen shugaban jam’iyyar APC”.

Ɗan sarauniya ya kuma ce a yanzu za su tattara hankali wajen dawo da martabar jam’iyyar APC da kuma samun ƙaruwar magoya baya.