Ba a kama Abdullahi Abbas ba – APC tsagin Ganduje

Jam’iyyar APC tsagin Gwamna Abdullahi Umar Ganduje a Kano, ta musanta raɗe-raɗin cafke shugabanta Malam Abdullahi Abbas.

Jami’in yaɗa labaranta Ahmad Aruwa shi ne ya bayyana hakan ga Freedom Radio a ranar Lahadi.

Aruwa ya ce, Abdullahi Abbas da Gwamna Ganduje suna birnin tarayya Abuja domin wasu ayyuka na musamman.

Daga cikin ayyukan akwai ɗaukaka ƙarar hukuncin da kotu ta yanke kan zaɓen mazaɓun jam’iyyar a Kano.

Ya ce, “Jiya mun yi waya da shi, da safen nan ma mun yi magana, kuma nan bada jimawa ba zamu yi ƙoƙari muga mutane sun saurari muryarsa”.

Ya ci gaba da cewa, tuni suka shiga bincike kan waɗanda ke yaɗa labarin cewa an kama shugaban jam’iyyar domin ɗaukar matakin doka a kansu.

Ƙarin labarai masu alaƙa:

Mahawarar cikin jam’iyyar APC a Kano tsagin Gwamna da tsagin Shekarau

Ɗan zago ne halastaccen shugaban APC – Ɗan Sarauniya