Malami ya rubutawa kwamitin bincikar Magu wasika kan zargin cin hanci

Ministan Shari’a kuma Antoni Janar na Kasa Abubakar Malami ya rubuta wasika ga kwamitin dake da bincikar dakatacen shugaban hukumar yaki da cin hanci da rashawa ta EFCC.

Wasikar dai ta bayyanawa shugaban kwamitin Ayo Salami cewa ba zai iya halartar zaman kwamitin ba, sakamakon ayyukan da suke karkashin ofishinsa a halin yanzu.

Wasikar ta Malami na zuwa ne kasa da makwanni biyu da Ministan shari’ar ke ikirarin cewa a shirye yake ya bayyana a gaban kwamitin domin amsa tambayoyi.

Sai dai lauyan Dakataccen shugaban hukumar ta EFCC Wahab Shitu ya bukaci kwamitin da ya tilastawa Minsitan shari’ar da ya bayyana gaban kwamitin domin amsa tambayoyin.