Jinƙai: Babban jojin Kano ya sallami fursunoni

Babban jojin jihar nan mai shari’a Nura Umar ya sallami wasu Fursinoni 35, wadanda aka tsare su ba bisa Ƙa’ida ba, a gidan gyaran hali na Goron Dutse.

Baba Jibo Ibrahim wanda shi ne mai magana da yawun kotunan kano ne ya fitar da sanarwar hakan.

Mai shari’a Nura Sagir Umar ya saki fursinonin a wata ziyarar kwanaki biyu da yake gudanarwa,a gidan gyaran hali na Goron Dutse.

Mai shari’a Nura ya ce, Kundin tsarin mulkin Najeria ya bashi dama na ziyartar gidajen gyaran hali a karkashin sashe na 1 daya cikin baka.

Haka kuma yana da ikon sakin duk wani Fursina da aka tsare ba bisa Ƙa’ida ba.

Sakin fursunonin ya biyo bayan matakin rage Cinkoson da ake samu a gidajen gyaran hali na Kano.