Kano: Rundunar ƴan sanda ta bai wa iyalan jami’an ta da suka rasu tallafi

Rundunar ‘yan sandan jihar Kano ta bai wa iyalan wasu jami’an ta biyu da suka rasu a bakin aiki tallafin naira miliyan ɗaya da dubu dari biyu da hamsin don rage musu radadi.

Jami’in hulda da jama’a na rundunar DSP Abdullahi Haruna Kiyawa ne ya bayyana hakan ta cikin wata sanarwa da aka rabawa manema labarai.

Sanarwar ta ce, kwamishinan ‘yan sanda Samaila Shuaibu Dikko ya miƙawa iyalan jami’an kudaden a karkashin shirin biyan iyalan wadanda suka rasu a bakin aiki inshora, wanda Sifeton ‘yan sandan kasar nan ke jagoranta.

Samaila Shuaibu Dikko ya kuma gargadi ‘yan uwan mamatan da suyi amfani da kudaden ta hanyar da ta dace, musamman wajen tallafawa marayun da aka bar musu da kuma ‘yan uwansu domin rage musu radadi.