Allah ya yiwa sarkin tsaftar Kano Alhaji Ja’afaru Ahmad Gwarzo rasuwa

Allah ya yiwa sarkin tsaftar Kano Alhaji Ja’afaru Ahmad Gwarzo rasuwa.

Guda daga cikin ƴaƴan sa mai suna Asma’u Ja’afaru ta tabbatar da rasuwar sa yayin zantawarta da Freedom Radio.

Ta ce, marigayin ya rasu a ƙasar Saudiyya jim kadan bayan yi masa aiki a zuciya.

Kafin rasuwar marigayin shi ne mai bai wa gwamnan Kano shawara kan harkokin tsaftar muhalli.

Ma’aikatar muhalli ta jihar Kano ta miƙa sakon ta’aziyyar ta ga gwamnan Kano Dakta Abdullahi Umar Ganduje da iyalan Marigayin.

Kwamishinan muhalli Dakta Kabiru Ibrahim ne ya miƙa saƙon ta’aziyyar a cikin wata sanarwa da mai magana da yawun ma’aikatar Sunusi Abdullahi Ƙofar Nai’sa ya sanyawa hannu.

Saƙon ta’aziyyar na bayyana marigayi sarkin tsaftar a matsayin jajirtacce mai hidimtawa al’ummar sa.