Amurka ta baiwa Iran kwana biyu ta amince da yarjejeniya ko ta sha ruwan wuta

Shugaban Amurka, Donald Trump ya ce ya bai wa Iran wa’adin kwana biyu ta amince da ”yarjejeniya” ta kuma buɗe mashigar Hormuz ko ”mu yi mata ruwan wuta”.

Cikin wani saƙo da ya wallafa a shafinsa na sada zumunta, Shugaba Trump ya ce: ”Ku tuna lokacin da na bai wa Iran kwana 10 ta amince da yarjejeniya ko ta buɗe mashigar Hormuz. Yanzu lokaci na ci gaba da ƙurewa”.

“Yanzu saura sa’a 48 kafin su sha ruwan wuta…”

A ranar 27 ga watan Maris ne dai Shugaba Trump ya bayyana cewa ya dakatar da duk wani hari kan cibiyoyin makamashin Iran na tsawon kwana 10.