An wayi gari da ganin an tone wasu kaburbura a Dan-tsinke dake Kano

A safiyar yau ne al’ummar unguwanni Dan-tsinke da Wailari dake karamar hukumar kumbotso a Jihar Kano, suka wayi gari da wani iftila’I, na shigar masu cikin makabartar yankin inda aka hake wasu kabururruka da kwashe wasu gawawwaki da aka binne.

Mai unguwar garin Ɗan tsinke Alhaji Sani Abdu ne ya tabbatar da hakan a safiyar yau inda yace suma sun wayi gari da ganin wannan lamari.

Wanda ya ce ‘sama da kabururruka hudu aka buɗe da kwashe wasu mamatan da ke ciki.

Da yake jawabi Shugaban kungiyar sintiri ta Vigilante Malam Ibrahim Umar Yaya, cewa yayi ‘yau da safe aka kira su zuwa makabartar cewa an ga wasu kabarurruka hudu a tone, wanda uku daga ciki an cere gawarwakinsu, an kuma bar likafanin, yayin da cikon na hudun kuma da gawar da likafanin duk an tafi dasu’.

Malam Muhammad Abdullahi Dan Sokoto guda ne cikin manyan dattawan yankin, yace ‘ya kamata mahukunta su shigo lamarin domin kawowa al’ummar yankin dauk’.

Suma mazauna yankin na Ɗan tsinke dai na nema hukumomin tsaro da mahukunta da su shigo ciki tare da kawo musu dauki domin kaucewa faruwar hakan nan a gaba.

Rahoton: Umar Abdullahi Sheka