An yi sulhu tsakanin KAROTA da masu adaidaita

Ƙungiyar ƙwadago ta ƙasa NLC reshen jihar Kano ta cimma matsaya tsakanin ƙungiyoyin masu adaidaita sahu da hukumar KAROTA.

An cimma matsayar cewa, masu adaidaita za su ci gaba da biyan harajin Naira ɗari-dari a kullum.

Biyan farko zai zama ta banki, yayin da sauran kuma zai zamo ta na’urar cirar kuɗi ta POS da sauran wuraren hada-hadar kuɗi.

NLC ta kuma buƙaci masu adaidaita sahu da su janye yajin aikin da suke ciki nan take.

Yanzu dai abin jira a gani shi ne ko ɓangarorin biyu za su karɓi sasancin da aka yi musu.