Ana zargin mutane 523 ne suka kamu da cutar Diphtheria a jihohi 5 na kasar nan

Cibiyar yaki da cututtuka masu yaduwa ta Najeriya NCDC ta ce mutane 216 ne suka kamu da cutar mashako wato diphtheria a turance a jihohin Kano, Yobe, Lagos, da Osun tun bayan bullarta, yayin da mutane 40 suka rasu sanadiyyar cutar a fadin kasar nan.

A cewar NCDC adadin wadanda ake zargin sun kamu da cutar kuwa ya kai 523 a jihohi biyar na kasar nan.

Shugaban sashin kula da cutar a hukumar NCDC Dr Bola Lawal ne ya sanar hakan, inda ya ce, tuni aka aike da tawagar jami’an bada agajin gaggawa zuwa yankunan da aka samu bullar cutar don dakile ta, tun daga watan disambar da ya gabata.